МЕМОРАНДУМ ЕҢБЕК ҚАТЫНАСЫН РЕТТЕЙДІ
Қызылорда облысының әкімі Қырымбек Көшербаев және ҚР Кәсіподақтар федерациясының төрағасы Бақытжан Әбдірайым мемлекет басшысының бастамаларын жүзеге асыру туралы меморандумға қол қойды.
Кездесу барысында облыс әкімі еңбек қатынастары саласындағы мәселелер аймақта ерекше бақылауға алынғанын атап өтті.
«2018 жылы жүргізілген 290 жоспардан тыс тексеру нәтижесімен 420 еңбек заңнамасының бұзушылығы анықталды. Оларды жою жөнінде 230 нұсқама берілді және 92 жауапты тұлға әкімшілік жауапкершілікке тартылып, 77 әкімшілік айыппұл салынды .Қолданылған шаралардың нәтижесімен 86 кәсіпорынның 1800-ден астам жұмыскерлеріне жалақы қарызы төленген. Облыс бойынша әлеуметтік шиеленістің алдын-алу, штат санын қысқартпау және жұмыс орнын сақтау мақсатында, қызметкерлердің еңбек құқықтары мен кепілдіктерін қамтамасыз ету мәселелері жөнінде ынтымақтастық туралы 2975 кәсіпорынмен меморандумдар жасалған»,-деді аймақ басшысы.
Меморандум аясында тараптар бес әлеуметтік бастаманы қолдауға және жүзеге асыруға бағытталған бірлескен іс-шаралар өткізіп, Қазақстан Республикасының Президенті Н.Ә.Назарбаевтың Жолдауын іске асырады. Бұл Қазақстанның әлеуметтік-экономикалық жаңғыруына, жұмыскерлердің әлеуметтік-экономикалық және еңбек құқықтары мен мүдделерін қорғау жүйесін дамытуға ықпал етеді.

©  ҚЫЗЫЛОРДА ОБЛЫСЫНЫҢ ӘКІМДІГІ

Барлық құқықтар қорғалған және сақталған.

Сайттан мәлімет қолданған жағдайда түпнұсқаға сілтеме болуы міндетті

Яндекс.Метрика